၃၁။    Delta Electronics (Myanmar) Co., Ltd သည် Choke, Filter, SMD Inductor, Transformer စသည့်ပစ္စည်းများထုတ်လုပ်ရာတွင် မူရင်းထိုင်းနိုင်ငံရှိ Delta Electronics (Thailand) PCL တွင် တာဝန်ထမ်းဆောင်နေသော ကျွမ်းကျင်ဝန်ထမ်းမှ မြန်မာလုပ်သား များအား နည်းပညာပိုင်းဆိုင်ရာ လာရောက်သင်ကြားပေးလျက်ရှိရာအဆိုပါဝန်ထမ်းများ၏  လစာနှင့်အထွေထွေအသုံးစရိတ်များကို Delta Electronics (Thailand) PCL ကျခံ သုံးစွဲပြီး Delta Electronics (Myanmar) Co.,Ltd အနေဖြင့် မည်သည့်အသုံးစရိတ်ကို မျှကျခံသုံးစွဲပေးခြင်းမရှိဘဲ အဆိုပါဝန်ထမ်းများသည် လက်ရှိဝင်ငွေရရှိလျက်ရှိသော ထိုင်း နိုင်ငံတွင် ဝင်ငွေခွန်ပေးဆောင်လျက်ရှိသဖြင့် မြန်မာနိုင်ငံတွင် ရက်ပေါင်း (၁၈၃) နှင့် အထက် နေထိုင်ပါက ဝင်ငွေခွန်ပေးဆောင်ရခြင်း ရှိ/ မရှိ မေးမြန်းခြင်း။

ဝင်ငွေခွန် ဥပဒေပုဒ်မ ၃၊ ပုဒ်မခွဲ (ဋ) အရ “ပြည်တွင်းနေနိုင်ငံခြားသားနှင့် စပ်လျဉ်း၍ ပုဒ်မခွဲငယ်(၁)တွင်တစ်ဦးချင်းပုဂ္ဂိုလ်ဖြစ်ပါက ဝင်ငွေနှစ်အတွင်း မြန်မာနိုင်ငံ၌ရက်ပေါင်း (၁၈၃) ရက်ထက်မနည်း နေထိုင်သောနိုင်ငံခြားသား”ဟု ပြဋ္ဌာန်းပါရှိပါသည်။ မြန်မာနိုင်ငံနှင့်ထိုင်းနိုင်ငံ တို့အကြား အခွန်နှစ်ထပ်ကျသင့်မှုရှောင်ရှားရေးသဘောတူစာချုပ်ပါ အပိုဒ် ၁၄ အရ Delta Electronics (Thailand) PCL မှ ဝန်ထမ်းများ၏ အခကြေးငွေသည် အမေရိကန် ဒေါ်လာ (၇၀၀၀)ထက်ကျော်လွန်ရရှိခဲ့ခြင်း၊ ယင်းအခကြေးငွေအား မြန်မာနိုင်ငံရှိ အမြဲတမ်းလုပ်ငန်း တည်ရှိရာဌာနက ကျခံပေးခြင်း၊ မြန်မာနိုင်ငံအတွင်း ရက်ပေါင်း(၁၈၃) ရက်ထက် ကျော်လွန်

နေထိုင်ခြင်းတို့ဖြစ်ပါက မြန်မာနိုင်ငံအတွင်း ဝင်ငွေခွန်ထမ်းဆောင်ရန် လိုအပ်မည်ဖြစ်ပါသည်။

၃၀။    ကုမ္ပဏီတစ်ခု၏ မတည်ပိုင်ပစ္စည်းများ (Non-current Assets) ကိုစစ်ဆေးရာတွင်မတည် ပိုင်ပစ္စည်းများစွာတိုးလာမှုကို စည်းကြပ်မှုမှလွတ်ကင်းနေသောဝင်ငွေအဖြစ် စည်းကြပ် ဆောင်ရွက်နိုင်ရမည်ကို အတည်ပြုမေးမြန်းခြင်း။

ကုမ္ပဏီ၏ တိုးလာသော မတည်ပိုင်ပစ္စည်းများ တန်ဖိုးအပေါ် ဝင်ငွေခွန်ဥပဒေ ပုဒ်မ ၄၇ အရ ဖော်ထုတ်စေ၍ စည်းကြပ်ခြင်း၊ ဒဏ်တပ်ရိုက်ခြင်းတို့ ဆောင်ရွက်ရမည်ဖြစ်သည်။

၂၉။    အခွန်ပေးဆောင်ရာတွင် ပင်ရင်းမှနုတ်ယူပေးသွင်းခွန် WHT ဖြတ်တောက်ရမည်ဖြစ်၍ နိုင်ငံခြားသားပိုင်လုပ်ငန်းများနှင့် အဖွဲ့အစည်းများတွင် INGO နှင့် NGO အဖွဲ့အစည်းများ ပါဝင်ခြင်း ရှိ/မရှိ သိရှိလိုပါ၍ မေးမြန်းခြင်း။

အမိန့်ကြော်ငြာစာအမှတ် ၅၁/၂၀၁၇ ဖြင့် ထုတ်ပြန် သတ်မှတ်ထားသည့် အပိုဒ်(၁) ဇယား အမှတ်စဉ် (ဂ) ၏ မူလသတ်မှတ်ချက်တွင် နိုင်ငံခြားသားပိုင်လုပ်ငန်းများနှင့် အဖွဲ့အစည်း များဟု ထုတ်ပြန်ထားသည့်အတွက် နိုင်ငံခြားသားပိုင်လုပ်ငန်းများနှင့် အဖွဲ့အစည်းများတွင် INGO နှင့် NGO အဖွဲ့အစည်းများလည်းပါဝင် ပါသည်။

၂၈။    အခွန်စည်းကြပ်မှုခံယူလျက်ရှိသော အသေးစားငွေရေးကြေးရေးအဖွဲ့အစည်းများမှ ၎င်းတို့ ထုတ်ချေးထားသည့်ချေးငွေကို ချေးငွေအတန်းအစားအလိုက် သတ်မှတ်ရာခိုင်နှုန်းများဖြင့် ကြွေးဆုံးလျာထားမှုများအား ကုမ္ပဏီများ၏နှစ်ချုပ်စာရင်းတွင် စရိတ်အဖြစ်တင်ပြခြင်း အပေါ် ဝင်ငွေခွန်ဥပဒေပုဒ်မ ၁၁၊ ပုဒ်မခွဲ (ခ) တွင် “စီးပွားရေးလုပ်ငန်းများ၏ဝင်ငွေကို တွက်ချက်ရာတွင် ဝင်ငွေရရှိရန် ကုန်ကျစရိတ်များနှင့် စည်းမျဉ်းများအရ ပြဋ္ဌာန်းသည့် ပစ္စည်းတန်ဖိုးလျော့ငွေတို့ကို နုတ်ပေးရမည်”ဟု ပြဋ္ဌာန်းထားပါသဖြင့် ၎င်းတို့အနေဖြင့် လုပ်ငန်းသဘောသဘာဝအရ ချေးငွေအပေါ် ကြွေးဆုံးမှုများဖြစ်ပေါ်နိုင်သည်ဖြစ်၍ ဘဏ္ဍာ နှစ်အတွင်း ချေးငွေသည် အမှန်တကယ်ပြန်မရသည့်ကြွေးဆုံးအား အရှုံးအမြတ်စာရင်းတွင် စရိတ်အဖြစ် တင်ပြလာခြင်းအပေါ် ခွင့်ပြုနိုင်ခြင်းရှိ/မရှိမေးမြန်းခြင်း။

ကြွေးဆုံး (အမှန်) ကို အထောက်အထားများစိစစ်၍ စရိတ်အဖြစ် ခွင့်ပြုနိုင်သော်လည်း ကြွေးဆုံး (လျာထား) ကို ခွင့်မပြုပါ။

၂၇။ UNICEF သည် မြန်မာ့ဆက်သွယ်ရေးလုပ်ငန်း၏ ဖိုင်ဘာအင်တာနက်ဝန်ဆောင်မှုအတွက် ကုန်သွယ်လုပ်ငန်းခွန် ၅ % ကင်းလွတ်ခွင့် ရှိ/ မရှိ မေးမြန်းခြင်း။

ဂျီနီဗာကွန်ဗင်းရှင်းအရ အဝယ်တန်ဖိုးတွင်ပါဝင်သော အခွန်အမျိုးအစားအတွက် ပြန်အမ်းငွေ ရခွင့်ရှိသည်ဟုပါရှိပါသဖြင့် ကင်းလွတ်ခွင့်ဟု မပါသော်လည်း ပြန်အမ်းငွေပေးရမည်ဆိုခြင်း ကြောင့် ကင်းလွတ်ခွင့်ပြုသည့်သဘောသက်ရောက်၍ ကင်းလွတ်ခွင့်ရှိပါသည်။

၂၆။    စားသောက်ဆိုင်ဖွင့်လှစ်ရောင်းချသူ လူပုဂ္ဂိုလ်တစ်ဦးက ပြေစာများတွင် ကပ်နှိပ်၍တောင်းခံ ရယူထားသည့် ကုန်သွယ်လုပ်ငန်းခွန်များအား  လကုန်ပြီး (၁၀) ရက်အတွင်း ပေးဆောင်ရ မည်ဟု ကြားသိထားပါကြောင်း၊ မပေးသွင်းဖြစ်ခဲ့ပါက ဒဏ်တပ်ရိုက်ခြင်း ရှိ/မရှိနှင့် တပ်ရိုက်ပါက မည်သည့်ဥပဒေပုဒ်မများဖြစ်သည်ကို  သိလိုသဖြင့်မေးမြန်းခြင်း။   

စားသောက်ဆိုင် ဖွင့်လှစ်ရောင်းချ လုပ်ကိုင်သည့် လုပ်ငန်းရှင်အနေဖြင့် ပြေစာများ၌ အခွန် အမှတ်တံဆိပ်များ ကပ်နှိပ်ပြီး တောင်းခံရယူထားသည့် ကုန်သွယ်လုပ်ငန်းခွန်များအား ကုန်သွယ်လုပ်ငန်းခွန်ဥပဒေပုဒ်မ ၁၂ အရ လစဉ် ကျသင့်သောအခွန်ကို သက်ဆိုင်ရာလ ကုန်ဆုံးပြီး တစ်ဆယ်ရက်အတွင်း ပေး​ဆောင်ရမည်ဖြစ်ပါသည်။ ပေးသွင်းရန်ပျက်ကွက်ပါက ကုန်သွယ်လုပ်ငန်းခွန်ဥပဒေပုဒ်မ ၂၁ (ခ) အရ စည်းကြပ်မှုအရ ကျသင့်အခွန်၏ တစ်ဆယ် ရာခိုင်နှုန်းဒဏ်ငွေပေးဆောင်ရမည်ဖြစ်ပါသည်။

၂၅။    ကျောက်မျက်ရတနာအရောင်းဆိုင် လိုင်စင်ရယူထားသူများအနေဖြင့် သက်တမ်းတိုးနိုင်ရန် အတွက် အခွန်ထောက်ခံစာရယူရန် သက်ဆိုင်ရာအခွန်ရုံးများနှင့် ဆက်သွယ်ဆောင်ရွက် သောအခါ အရင်းအနှီး (Investment) အပေါ်တွင်လည်း အခွန်စည်းကြပ်မှု ခံယူရမည် ဆိုသည်မှာ မှန်ပါသလား။

မှန်ပါသည်။ သက်ဆိုင်ရာမြို့နယ်အခွန်များဦးစီးဌာနမှူးရုံးမှ အခွန် ကိစ္စဆောင်ရွက်ပြီးကြောင်း အထောက်အထားရယူခြင်းနှင့်စပ်လျဉ်း၍  လုပ်ငန်းစတင်ချိန်တွင် အသုံးပြုသည့် ဝင်ငွေ/ အရင်း အနှီး၊ လုပ်ငန်းထပ်မံတိုးချဲ့ဆောင်ရွက်ခြင်းတို့အတွက် အသုံးပြုသည့်ဝင်ငွေ/ အရင်းအနှီး တို့အပေါ် အခွန်စည်းကြပ်မှုခံယူရမည်ဖြစ်ပါသည်။ ဝင်ငွေရလမ်းတင်ပြနိုင်ပါက ယင်းဝင်ငွေ အား နုတ်ပယ်ပြီး ကျန်စည်းကြပ်မှုမှ လွတ်ကင်းနေသော ဝင်ငွေ/ အရင်းအနှီးအပေါ်လည်း ကောင်း၊ ဝင်ငွေရ လမ်းတင်ပြနိုင်ခြင်းမရှိပါက အသုံးပြုသည့် ဝင်ငွေ/ အရင်းအနှီးအပေါ်တွင် လည်းကောင်း ၂၀၁၇ ခုနှစ် ပြည်ထောင်စု၏အခွန်အကောက်ဥပဒေပုဒ်မ ၂၅ အရ ၁၅ % မှ ၃၀% အထိ အလွှာလိုက်ဝင်ငွေခွန်နှုန်းထားဖြင့်  အခွန်စည်းကြပ်မှု ခံယူရမည်ဖြစ်ပြီး၊ ဝင်ငွေ ရလမ်းတင်ပြနိုင်ပါက အခွန်ထမ်းဆောင်ရန်မလိုအပ်ပါ။

၂၄။    ကျောက်မျက်ရတနာဆိုင် လိုင်စင်ရယူထားသဖြင့် သက်တမ်းတိုးနိုင်ရန်အလို့ငှာ သက်ဆိုင်ရာ အခွန်မှူးများနှင့် ဆက်သွယ်ဆောင်ရွက်ရာတွင် မလွှဲမသွေ အရောင်းပြသရမည်ဆိုသည်မှာ မှန်ပါသလား။

ကျောက်မျက်ရတနာဆိုင် လိုင်စင်သက်တမ်းတိုးရန် သက်ဆိုင်ရာအခွန်မှူးများနှင့် ဆက်သွယ် ဆောင်ရွက်ရာတွင် အမှန်အတိုင်း အရောင်းစာရင်းတင်ပြရမည်ဖြစ်သည်။

၂၃။    ကျောက်မျက်ရတနာ ကိုင်ဆောင်ခွင့်လိုင်စင်သီးသန့်မရှိသဖြင့် ကျောက်မျက်ရတနာ ကိုင်ဆောင်လိုသူများသည် မြန်မာ့ကျောက်မျက်ရတနာ ဥပဒေအရ ဥပဒေနှင့်အညီဖြစ်စေရန် အရောင်းဆိုင်လိုင်စင်ရယူထားသော်လည်း လိုင်စင်ရယူရုံသက်သက်သာ ရယူထားသည့် သူများအပေါ် မည်သို့အခွန်စည်းကြပ်ပါသနည်း။ (ဥပမာ-အိမ်တွင် ကျောက်မျက်ရတနာ ထားခြင်းအပေါ် ဥပဒေနှင့်အညီဖြစ်စေရန် လိုင်စင်ကိုင်ဆောင်သူ၊ ပွဲစား၊ ကျောက်မျက် ရတနာပြပွဲများတွင် တက်ရောက်ပြသလိုသူ၊ သာမာန်အသေးစားဝယ်ရောင်းများ)

မြန်မာ့ကျောက်မျက်ရတနာဥပဒေနှင့်အညီ အရောင်းဆိုင်လိုင်စင်ရယူထားသူသည် အထူး ကုန်စည်ခွန်ဥပဒေအရသော်လည်းကောင်း၊ ကုန်သွယ်လုပ်ငန်းခွန်ဥပဒေအရသော်လည်းကောင်း၊ ဝင်ငွေခွန်ဥပဒေအရသော်လည်းကောင်း အခွန်ထမ်းမှတ်ပုံတင်ခြင်း၊ ကြိုတင်ဝင်ငွေခွန် ပေးဆောင်ခြင်းနှင့် အခွန်စည်းကြပ်မှုခံယူခြင်းတို့ကို လိုက်နာဆောင်ရွက်ရမည် ဖြစ်ပါသည်။ အထူးကုန်စည်ခွန်ဥပဒေပုဒ်မ ၂၂ ၊ ပုဒ်မခွဲ (ဂ) အရ အခွန်မပေးဆောင်ရ သေးသော အထူး ကုန်စည်ဖြစ်သည့် ကျောက်မျက်ရတနာများကို ရရှိပိုင်ဆိုင်ထားခြင်းအတွက် လက်ဝယ် ထားရှိသူက ယင်းကုန်စည်တန်ဖိုး၏ ၁၀၀ ရာခိုင်နှုန်းပေးဆောင်ရမည့်အပြင် ယင်းကုန်စည် များကို ပြည်သူ့ဘဏ္ဍာအဖြစ် သိမ်းယူခြင်းခံရမည်ဖြစ်သည်။ သို့ပါ၍ အထူးကုန်စည်ခွန် ဥပဒေအရသော်လည်းကောင်း၊ ကုန်သွယ်လုပ်ငန်းခွန်ဥပဒေအရသော်လည်းကောင်း၊ ဝင်ငွေခွန် ဥပဒေအရသော်လည်းကောင်း အရောင်းဆိုင်လိုင်စင်ရယူထားသူက လိုက်နာဆောင်ရွက်ရမည် ဖြစ်သည်။

၂၂။    နိုင်ငံတော်မှကြီးမှူးကျင်းပသည့် ကျောက်မျက်ရတနာပြပွဲတွင် ရောင်းချသူများသည် ပင်ရင်း ထက်လျော့၍ အရှုံးခံရောင်းချခဲ့သည်များလည်းရှိတတ်သဖြင့် အဆိုပါကိစ္စမျိုးတွင် အခွန် မည်သို့စည်းကြပ်ပါသနည်း။

ကျောက်မျက်ရတနာပြပွဲတွင် ဝယ်ရင်းထက်လျော့၍ အရှုံးခံရောင်းချခဲ့လျှင် တည်ဆဲအခွန် ဆိုင်ရာဥပဒေများနှင့်အညီ စနစ်တကျပြုစုထားရှိထားသော၊ မှန်ကန်သောစာရင်းဇယား၊ အထောက်အထားများဖြင့် တင်ပြရှင်းလင်း၍ အခွန်စည်းကြပ်ခံယူရမည်ဖြစ်ပါသည်။

Pages